بسم الله الرحمن الرحيم
اسلام عليكم ورحمة الله وبركاته
Alhamdulillah syukur kepada Allah SWT atas nikmat iman yang diberi, selawat ke atas Nabi,salam perjuangan dan salam kasih sayang dalam mencari redha Allah.
Hah! entri kali ini adalah berkaitan dengan bahasa ibundaku..bahasa banjar..pada sesiapa yang tidak berminta untuk meneruskan bacaan kerana tidak ada kena mengena dengan banjar bolehlah membaca entri-entri yang lain. Mesti kelakarkan kumat-kamit mulut pembaca nak baca cerita ni sampai habis. Apa pun penulis berbangga dengan bahasa banjar..bahasa keturunanku..sebuah bangsa yang punya sejarah sendiri,punya kisah atau cerita sendiri..juga punya keunikan tersendiri...
Kisah Si Palui >> Mancuba kada babayar.
Mancuba Kada Babayar
PALUI itu tamasuk urang nang kada tapi cariwit wan gawian. Samunyaan usaha dicubanya, asal kawa jadi duit gasan mahidupi anak bini di rumah.
Wayah musim limau ini Palui bausaha bajualan limau. Ada limau Sungai Madang, limau Anjir dan ada jua limau Kalampayan Astambul.
Supaya banyak hujungannya, Palui manukari limau jualannya itu langsung matan kabunnya. Tapi rupanya Palui kada saurangan, banyak jua urang lain nang bajual limau. Karna banyak saingan itulah maka rancak banar Palui tapaksa bajual murah asal tabulik mudal, daripada limaunya burukan karna kada payu lalu inya rugi. Ngalu pulang kapala Palui mamikirakan nangkaya apa supaya kawa manarik pembeli. Wayah tatamu wan Garbus inya bakisah tantang masalahnya itu.
"Mustinya ikam banyak hujungnya karna ikam langsung manukari matan kabunnya," ujar Garbus.
"Aku kada tahu jua Bus ai, jangankan bahujung atawa tabulik mudal bahkan dalam samingguan ini rugi tarus," ujar Palui takurasam muha pina sadih.
"Mungkin ikam salah taktik ma-atur barang jualan ikam itu, makanya rugi tarus," ujar Garbus.
"Padahal limaunya manis-manis saharusnya urang barabut manukarinya," ujar palui.
"Biarpun limaunya manis-manis, amun prumusinya kurang, tatap haja urang kada hakun manukar," ujar Garbus.
"Prumusi kaya apa Bus? Sudah jua aku tulisi di karton, bahwa limaunya manis tapi tatap haja urang kada hakun baparak," ujar Palui sadih.
"Bulihlah kalu urang manguyak sabigi handak marasai?" ujar Garbus pulang.
"Kalu manguyak ba-arti manukar dan harus bayar," ujar Palui.
"Nah itulah sababnya kanapa urang kada manukari limau ikam, karna ikam kada mau kurang labih. Urang kada hakun manukar kucing dalam karung Lui ai. Saharusnya ikam bariakan haja urang marasani," ujar Garbus mambari nasihat.
Oooooo... kaya itu kah Bus. Tarima kasih Bus lah, ayu ja kaina aku turuti papadahan ikam itu," ujar Palui manyalami Garbus langsung parmisi tulak handak bajualan.
Kamariannya Palui datang pulang manamui Garbus, makin marista haja muhanya.
"Nangkaya apa Lui, banyaklah urang manggarubungi?" ujar Garbus sambil manyirit ka bakul limau Palui nang puang.
"Bujur haja banyak nang bagarubung wan jualanku habis, tapi aku tatap rugi ganal," ujar Palui sadih.
"Hau, kanapa maka nangkaya itu?" ujar Garbus batakun.
"Sasuai papadahan ikam tadi supaya manarik urang nang handak manukar maka aku bakuriak : limau manis, limau Madang, bulih buktiakan, silakah cuba kada bayar perai haja," ujar Palui pina parau suaranya.
"Rupanya karna bulih cuba kada bayar itulah maka bagarubung balawi-lawi urang datangan mancubanya. Ada nang ma-ambil sabigi dan ada jua nang dua bigi, ahirnya babakul-bakul habis. Sedangkan nang manukari hanya dua talu ikung haja," ujar Palui sadih.
"Ooooo......... jadi karna banyak nang mancuba perai itulah maka limau ikam habis tapi rugi. Ujar urang bahari kada usah sakit hati, biar rugi di acan tapi bahujung di asam, jadi biarpun ikam rugi babakul-bakul limau tapi pahalanya cagar ikam nikmati di ahirat kaina" ujar Garbus mahibur Palui.
"Rupanya sudah nasibku sakit balalawasan" ujar Palui taungut
Kisah 2
Sapuluh Balik
GARBUS himung banar karna tahun ini hasil katamannya banyak banar, biar musim kamarau tapanjang tapi hasilnya parak dua kali tahun lalu.
"Kataman bahasil artinya kampung kita makmur biarpun zaman krismon dan musim kamarau panjang, panghidupan warga kita kada sakit," ujar Palui.
"Makanya kalu handak baduit dan gawian bahasil jangan malandau bangun, imbah sambahyang subuh langsung haja ambil cangkul lalu tulak kapahumaan," ujar Garbus manasihati.
"Tarima kasih nasihat ikam Bus ai, tapi ampun maaflah aku mamunji ini kadada maksud handak maminta apa-apa apalagi maminta duit karna aku pun kada kakurangan duit," sahut Palui sambil mahampas salipi kahadapan Garbus.
"Kalu kaya itu aku basyukur jua kawan sanang," ujar Garbus.
"Tarus tarang haja Bus ai biarpun aku malandau bangun dan jarang bakakawanan di sini tapi aku wan biniku ada usaha dan cukup haja maungkusi anak sakulah," ujar Palui.
"Napa usaha ikam Lui?" ujar Garbus batakun.
"Aku dapat razaki dana kumpinsasi BBM nang hanyar babagi di kalurahan, kupakai gasan bajualan wadai, nasi bungkus wan katupat wan sabagiannya gasan mudal kios," ujar Palui sambil batuhui.
"Wah, kalu kaya itu nyaman banar hidup ikam," ujar Gabus.
"Karna ikam hanyar mangatam dan banyak pahulihan maka tulunglah Bus antari aku baras hanyar," ujar Palui.
"Banyakkah Lui ikam handak, barapa balik?" ujar Garbus.
"Kada banyak pang hanya gasan katupat wan nasi kabuli, kurang labih sapuluh balik haja," ujar Palui.
Kamariannya datanglah Garbus ma-antarakan baras hanyar pasanan Palui, karna pasanannya banyak sampai sapuluh balik maka Garbus tapaksa manyiwa garubak.
"Lui..........ui Palui, ininah aku ma-antarakan baras pasanan ikam," ujar Garbus bakiyau.
"Bawa-akan ka dapur, biniku mahadangi barasnya gasan dirandam diulah galapung," ujar Palui sambil kaluar rumah mamaraki Garbus. Palui takajut banar karna Garbus ma-antarakan pasanannya bakarung-karung wan garubak.
"Kanapa maka banyak banar sampai bakarung-karung Bus?" ujar Palui.
"Sasuai pasanan ikam sapuluh balik," sahut Garbus.
"Maksudku......... maksudku sapuluh balik halus, sapuluh cuntang haja, kadanya sapuluh balik 20 liter itu," ujar Palui.
"Waahhhh........ Paluuiiii, kanapa maka kada jalas-jalas bapasan sapuluh cuntang haja, padahal kuantari bagarubak. Kalu kaya itu haraga sapuluh cuntang haja kada cukup gasan mambayar siwa garubaknya," ujar Garbus marista kakalahan.
p/s:ade sesiapa yang faham ke?...hehehehe..
No comments:
Post a Comment